Azərbaycanlı qadınlar Türkiyədə zəlzələdən zərərçəkənlərə yardım göndəriblər

Azərbaycanlı qadınlar tərəfindən toplanan humanitar yardımı daşıyan 6 ədəd TİR Bakıdan Türkiyəyə yola düşüb.

Azərbaycanda Qadın Sahibkarlığının İnkişafı Assosiasiyasından (AQSİA) Xəbər15-ə bildirilib ki, “Qardaş Köməyi” Platformasının təşkilatçılığı ilə AQSİA tərəfindən toplanan konteyner ev, çadır və ərzaq məhsullarından ibarət 6 yük maşınını Türkiyənin Bakıdakı səfiri Cahid Bağcı, deputatlar və QHT nümayəndələri yola salıb.

Cahid Bağcı azərbaycanlı qadınların anlamlı bir tədbirə imza atdıqlarını bildirib. Səfir zəlzələnin baş verdiyi ilk anlardan etibarən Azərbaycanın dəstəyini hiss etdiklərini vurğulayıb.

Tədbirdə iştirak edən deputatlar, QHT nümayəndələri bildiriblər ki, yardımlar davamlı olacaq və hər an Türkiyənin yanında olduğumuzu göstərəcəyik.

O da qeyd olunub ki, “Qardaş Köməyi” Platformasının təşkilatçılığı ilə indiyə qədər 155 TİR yardım göndərilib və proses davam etdiriləcək.