Nüfuzlu “Daily Sabah” Azərbaycan könüllülərinin Türkiyədəki fəaliyyətindən yazdı

Türkiyə mediası Azərbaycan gənclərinin qardaş ölkədə baş verən təbii fəlakət bölgələrindəki könüllü fəaliyyətinə dair informasiyalara geniş yer ayırmağa davam edir.

Xəbər15 bildirir ki, nüfuzlu “Daily Sabah” nəşri ingilis dilində “Azərbaycandan olan könüllülər Türkiyəyə zəlzələdən xilas olmaqda köməklik edir” sərlövhəli məqalə hazırlayıb. Türkiyənin ən yaxın müttəfiqlərindən biri olan Azərbaycanın faciədən sonra həm yardım, həm də axtarış-xilasetmə qrupları göndərərək ilk beynəlxalq dəstəkçilərdən biri olduğu xüsusi vurğulanıb.

Məqalədə qeyd edilib ki, Azərbaycandan olan ekipajlar axtarış-xilasetmə işlərini yekunlaşdırıb, lakin sağ qalanların yaralarını, xüsusən də psixoloji təsirlərini sağaltmaq üçün azərbaycanlı gənclər Türkiyədə könüllü kimi fəaliyyətini davam etdirir.

Məqalədə, həmçinin zəlzələlərin episentri olan Kahramanmaraşdakı çadır şəhərciyində fəaliyyət göstərən Azərbaycandan olan könüllü gənclərin fikirlərinə geniş yer verilib.