Türkiyədə “Caspian Energy Investment Forum Istanbul 2023” keçiriləcək

Aprelin 30-da “Caspian Energy Club” və “Caspian Energy Türkiye”nin birgə təşkilatçılığı ilə beynəlxalq “Caspian Energy Investment Forum Istanbul 2023” tədbiri keçiriləcək.

Xəbər15 məlumat verir ki, bu barədə “Caspian Energy Türkiye”nin İdarə Heyətinin sədri Süleyman Məcidli bildirib.

Onun sözlərinə görə, bu forum “Caspian Energy Club” tərəfindən 20 ölkədə keçirilməsi planlaşdırılan və Azərbaycanın Ümummilli Lideri Heydər Əliyevin 100 illik yubileyinə həsr olunmuş tədbirlər çərçivəsində keçirilir.

Süleyman Məcidli qeyd edib ki, təşkil olunacaq beynəlxalq “Caspian Energy Investment Forum Istanbul 2023”ün əsas mövzuları qabaqcıl ölkələrin inkişaf modeli, orta dəhlizin inkişafı, rəqəmsal iqtisadiyyat, yaşıl enerji və türkdilli ölkələrin iqtisadi birliyi ilə əməkdaşlıq olacaq.

“Məqsədimiz regionda olan davamlı inkişaf proseslərinin işıqlandırılması, Türkiyə iqtisadiyyatında keçirilən islahatların pozitiv nəticəsi, zəlzələdən zərərçəkmiş bölgələrə və digər regionlara investorların cəlb olunması, dövlət və özəl sektorda həyata keçirilən layihələri beynəlxalq arenada tanıtmaqdır. Hədəfimiz forum iştirakçıları üçün beynəlxalq səviyyədə şəbəkələşməyə şərait yaratmaqdır”, – deyə Süleyman Məcidli söyləyib.

Foruma hazırlıq ərəfəsində bir çox dövlət qurumları və aparıcı holdinqlərin rəhbər və səlahiyyətli nümayəndələri ilə görüşlər aparıldığını diqqətə çatdıran İdarə Heyətinin sədri onların keçiriləcək forumla bağlı dəyərli məsləhət və rəylərini diqqətlə nəzərə aldıqlarını vurğulayıb. Həmçinin Azərbaycanın Türkiyədəki fövqəladə və səlahiyyətli səfiri Rəşad Məmmədov, Türkiyənin Azərbaycandakı fövqəladə və səlahiyyətli səfiri Cahit Bağcı, Türkiyə Ticarət Nazirinin müavini Sezai Uçarmak, Türkiyə Böyük Millət Məclisinin Azərbaycanda dostluq qrupunun rəhbəri, AK Parti İstanbul millət vəkili Şamil Ayrım, Türkiyə Respublikası Kömür Müəssisələrinin Baş direktoru Dr. Hasan Hüseyin Erdoğan və Türkiyənin Energetika Nazirliyi ilə bir sıra görüşlər keçirilib.

“Əminik ki, “Caspian Energy Investment Forum Istanbul 2023” bundan öncə keçirilmiş “Caspian Energy Investment Forum Tbilisi 2023” və “Caspian Energy Investment Forum Prague 2023” forumları kimi uğurlu və nəticəli olacaq. Ümidvaram ki, bu forum, həmçinin qarşılıqlı işgüzar əlaqələrin daha da möhkəmlənməsinə, iki ölkə arasında iqtisadiyyatın müasir inkişaf perspektiv və tendensiyalarının istifadəsinin təcrübə mübadiləsinə öz töhfəsini verəcək”, – deyə Süleyman Məcidli əlavə edib.