Türkiyədən gətirilən tinglərlə Saatlıda intensiv əncir bağı salınır

Azərbaycanda ilk və yeni olan intensiv əncir bağı Saatlının Qaralar kəndində, fermer Həbib Əhmədovun təsərrüfatında salınır.

Xəbər15 məlumat verir ki, Türkiyə təcrübəsindən istifadə etmək üçün qardaş ölkədən mütəxəssislər də dəvət edilib. Bağ intensiv əkinçilik olduğu üçün ağaclar tirə üsulu ilə əkilir. Məqsəd ağacları qrunt sularından qorumaq, eləcə də suya olan tələbatı nizamlaya bilməkdir.

7 hektar ərazini əhatə edən bağ Türkiyədən gətirilən “Bursa siyahı” adı ilə tanınan tinglərdən ibarət olacaq. Bu sort yüksək məhsuldarlığı ilə seçilir, eyni zamanda, xarici bazar üçün də çox münasibdir. Hazırda əkilən fidanlar bir yaşındadır və iki yaşından etibarən məhsul verməyə başlayacaq. Hər biri 80-100 qram ağırlığında olmaqla, bir hektardan 40 ton civarında əncir məhsulu götürmək mümkün olacaq. Sonrakı illərdə isə məhsuldarlıq daha da artacaq.