Türkiyənin əlamətdar günü Elitar gimnaziyada qeyd edilib

Möhkəm təmələ malik olan Azərbaycan-Türkiyə dostluğu təkcə siyasi sferada yox ,həm də təhsildə də özünü göstərir. İlyas Əfəndiyev adına Elitar gimnaziya da bu dostluğa sadiq qalan, onu hər zaman inkişaf etdirən təhsil müəssisələrindən biridir. 2022-ci ildən İlyas Əfəndiyev adına Elitar gimnaziya OCEP layihəsində Türkiyəni təmsil edir və müxtəlif tədbirlər keçirir. OCEP məhz bu görüşlər vasitəsi ilə həmrəylik, sülhsevərlik, multikultural dəyərlərə sadiqlik mesajını bütün dünyaya ötürməyi bacarır .

Xəbər15 məlumat verir ki, OCEP layihəsi çərçivəsində bu il də müxtəlif tədbirlər keçirilir. Bu tədbirlərdən biri də Türkiyə tarixində əlamətdar gün sayılan “19 may – Atatürkü Anma, Gənclik və İdman Bayramı” günü münasibəti ilə Elitar gimnaziyada təşkil edilib.

Bu bayram Türkiyə Cümhuriyyətinin rəsmi bayramıdır.

Azərbaycan Respublikası Elm və Təhsil Nazirliyinin sektor müdiri Fuad Qarayev, Türkiyə Cümhuriyyətinin təhsil müşaviri Nurullah Feyzi Yazıçı, Nəsimi Rayon İcra Hakimiyyətinin başçısı Asif Əsgərov, birinci müavini Gülarə Verdiyeva, Milli Olimpiya Komitəsinin beynəlxalq proqramlar şöbəsinin müdiri Mehman Kərimov, komitənin əməkdaşı Ruslan Məmmədov, Milli Qəhrəman Polad Həşimovun həyat yoldaşı Ofeliya Həşimova, “Qubadlı fatehi” Vidadi Xəlilovun yoldaşı Nərmin Xəlilova tədbirin qonağı oldular. Tədbirdə Elitar gimnaziyanın şagirdlərinin nitqində xalqımızın Ümummilli Lideri Heydər Əliyevin, Ulu Öndər Mustafa Kamal Atatürkün, Prezident, Ali Baş Komandan İlham Əliyevin sitatları dinlənildi, Azərbaycan-Türkiyə dostluğundan bəhs edən videoçarxa baxıldı.

Gimnaziyanın balaca balalarının hazırladığı “Zeybək” və “Ay-ulduz “rəqsi qonaqlar tərəfindən alqışla qarşılandı və 10 A 1 şagirdinin ağır atletika üzrə idmançı Naim Süleymanoğlunu təsvir etdiyi çıxışı maraq yaratdı. OCEP layihəsi çərçivəsində müxtəlif tədbirlərdə iştirak edib uğur qazanmış şagirdlər qonaqlara təqdim olundu. Tədbirboyu duyğulu anlar yaşayan qonaqlar çıxış edərək şagirdləri təbrik edib gələcək layihələrdə uğurlar arzuladılar.