Ziraat Bank Azərbaycan Türkiyədə təbii fəlakətdən əziyyət çəkənlərə 500 000 ABŞ dolları ianə etdi

Türkiyə Respublikasının cənub-şərqində bu ilin fevral ayında baş vermiş təbii fəlakət nəticəsində meydana gəlmiş dağıntıların aradan qaldırılması üçün işlər davam edir. Zəlzələnin ağır fəsadlarının aradan qaldırılmasına dəstək vermək məqsədi ilə Ziraat Bank Azərbaycan zərərçəkənlərə yardım üçün AFAD (Türkiyə Daxili İşlər Nazirliyinin Təbii Fəlakət və Fövqəladə Hallar Agentliyi) fonduna əlavə 400 000 ABŞ dolları köçürərək ümumilikdə ianə edilmiş məbləği 500 000 ABŞ dollarına çatdırdı.

Xəbər15 məlumat verir ki, Ziraat Bank Azərbaycan təbii fəlakətin baş verdiyi ilk gündən etibarən ölkə vətəndaşları tərəfindən “AFAD” hesabına edilən yardımların operativ və komissiyasız icra edilməsini təmin etmişdir. Həmçinin Bank həmvətənlərimizin ianə etmə üsulları ilə aydın şəkildə tanış olaraq köçürmələrini rahat icra etmələri üçün fərqli izahedici video təlimatlar hazırlayaraq sosial media kanallarında paylaşıb. Eyni zamanda Ziraat Bank Azərbaycan “AFAD” qurumunun Azərbaycanda rəsmi hesab açmasına dəstək verərək ianələrin daha sürətli və rahat çatdırılmasına vasitəçi olub. Maddi yardımla yanaşı humanitar yardımda da iştirak edən Bank, əməkdaşları tərəfindən toplanılan yardımların təhvil verilməsində öz dəstəyini göstərib.